შეერთებული შტატების პრეზიდენტის ადმინისტრაციაში მსჯელობენ გაასაჯაროვონ თუ არა აშშ-ს დაზვერვის მიერ მოპოვებული ინფორმაცია, რომლის თანახმადაც, ჩინეთი ფიქრობს, მიაწოდოს თუ არა იარაღი რუსეთს უკრაინის წინააღმდეგ ომისთვის. ამის შესახებ წერს The Wall Street Journal, თეთრი სახლის ანონიმურ წყაროებზე დაყრდნობით.
WSJ-ის წყაროს განცხადებით, ჩინეთი აქამდე ფრთხილად მოქმედებდა, საყოველთაო სანქციების გამოცხადების შემდეგ, ძირითადად რუსეთის ფედერაციიდან ნავთობის ყიდვით შემოიფარგლებოდა, მაგრამ ახლა ჩინეთის ხელმძღვანელობა განიხილავს, კვლავ დაემორჩილოს დასავლეთის სანქციებს თუ რუსეთთან დაკავშირებით საკუთარი მიდგომები შეცვალოს.
აშშ-ისა და მისი მოკავშირე ქვეყნების დაზვერვის მონაცემებით, ჩინეთმა იცის თუ რა გზებითაა შესაძლებელი რსეთისთვის სამხედო დახმარება თუმცა, დაზვერვის შეფასებით, პეკინს ჯერ არ მიუღია გადაწყვეტილება რუსეთის ფედერაციისთვის იარაღის მიწოდების შესახებ, წერს ამერიკული გამოცემა.
აღნიშნულია, რომ ჩინეთის პოტენციური გეგმების შესახებ ინფორმაციის საჯაროდ გამჟღავნების საკითხის განხილვა მიმდინარეობს გაეროს უშიშროების საბჭოს სხდომის წინა დღეს, რომელიც უკრაინაში რუსეთის შეჭრის პირველ წლისთავს მიეძღვნება.
The Wall Street Journal-ის მიერ გამოქვეყნებულ სტატიას წინ უძღოდა აშშ-ის სახელმწიფო მდივანის ენტონი ბლინკენის 19 თებერვალს გაკეთებული განცხადება. ბლინკენის თქმით ის შეშფოთებულია რადგან, პეკინი მოსკოვთან პარტნიორობის გაღმავებას განიხილავს და აპირებს რუსული სამხედრო სექტორისთვის “ლეტალურ მხარდაჭერას”. ზოგიერთი ცნობით, ბლინკენმა ეს საკითხი შაბათს ჩინეთის საგარეო საქმეთა მინისტრთან ვანგ ისთან შეხვედრისას დააყენა.
აშშ-ის ელჩმა გაეროში ლინდა თომას-გრინფილდმა ხაზგასმით აღნიშნა, რომ ჩინეთი გადალახავს “წითელ ხაზს”, თუ ის გადაწყვეტს უკრაინის წინააღმდეგ ომში რუსეთისთვის სამხედრო დახმარების გაწევას.
თავის მხრივ, ჩინეთის საგარეო საქმეთა სამინისტრო უარყოფს რუსეთისთვის უკრაინის წინააღმდეგ ომისთვის „ლეტალური მხარდაჭერის“ განზრახვას.
