უკრაინული დრონების შიშით რუსეთში აეროპორტებმა მუშაობა შეაჩერეს

7 მაისის დილისთვის რუსეთში მოქმედი აეროპორტების დიდმა ნაწილმა მუშაობა შეაჩერა. რუსული მედიის ინფორმაციით, უკრაინის სამხედრო ძალების უპილოტო საფრენი აპარატების თავდასხმის გამო აეროპორტების ადმინისტრაციები იძულებულნი გახდნენ ფრენების განრიგი დაეკორექტირებინათ. ავიაკომპანიები კი ფრენების გადადების ან მათი გაერთიანების შესახებ იუწყებიან, წერს bm.ge

– მუშაობა შეაჩერეს კიროვის, ნიჟნი-ნოვგოროდისა და ტამბოვის აეროპორტებმა. დროებითი შეზღუდვა იყო ასევე ყაზანისა და ნიჟნიკამსკის აეროპორტებში, რომელიც როსავიაციის ინფორმაციით, მოგვიანებით მოიხსნა.

– მოსკოვის დომოდედოვოს და ჟუკოვის აეროპორტებმა ფრენების განრიგში შესაძლო ცვლილებების შესახებ გაავრცელეს ინფორმაცია, რაც ფრენების გადადებას და სხვა აეროდრომებზე გადასვლას მოიცავს. „აღნიშნული ზომები ფრენების უსაფრთხოების უზრუნველყოფისკენაა მიმართული“, – ნათქვამია განცხადებაში.

– მგზავრებს აეროპორტში გამგზავრების წინ ავიარეისების სტატუსის გადამოწმებას ტელეფონით, საინფორმაციო ბიუროში ან ტელეგრამ არხებით სთხოვენ.

შესაძლო ცვლილებების შესახებ განცხადებები ავიაკომპანიებმაც გაავრცელეს:

– აეროპორტების მუშაობის შეჩერებიდან გამომდინარე შესაძლოა ავიარეისების ნაწილი გაუქმდეს ან გაერთიანდეს – განაცხადეს „აეროფლოტში“. ავიაკომპანია გაუქმებული რეისის მგზავრებს სხვა ავიარეისებზე თავისუფალი ადგილების არსებობის შემთხვევაში ბილეთების გადაჯავშნას ან თანხის დაბრუნებას სთავაზობენ. ანალოგიური განცხადება გაავრცელა „აეროფლოტის“ შვილობილმა კომპანია „როსსიამ“.

– რუსული ავიაგადამზიდავის კიდევ ერთმა შვილობილმა „პობედამ“ რეისების ნაწილის იძულებითი გაუქმების შესახებ განაცხადა. „შესაძლოა შეჩერება და სათადარიგო აეროდრომებზე გადამისამართება“, – ნათქვამია განცხადებაში.

– „ურალის ავიახაზებმა“ 18 რეისი გააუქმა, სათადარიგო აეროდრომებზე 9 თვითმფრინავი გადამისამართდა, 40-მდე კი გაჩერდა. ავიაკომპანიის ინფორმაციით, მოსკოვში ჩაფრენას ან მოსკოვიდან გაფრენას თითქმის 8.5 ათასი ადამიანი ელის. მგზავრებს ბილეთების გადაცვლას ან თანხის დაბრუნებას სთავაზობენ.

– დომოდედოვოდან ფრენების ნაწილის გაუქმებისა და ნაწილის გადამისამართების შესახებ განაცხადა ავიაკომპანია S7-მაც.

– შესაძლო ცვლილებების შესახებ განცხადება Azur Air-მა, Nordwind-მა და Nordstar-მა გაავრცელეს.

– პულკოვოს სათადარიგო აეროდრომმა 6-7 მაისს 74 თვითმფრინავი მიიღო.